COVID 19 clips Social Action's wings

The 2020 Social Action Committee

 Die COVID-19 pandemic has played havoc with our Social Action’s year programme for 2020. All events since March had to be cancelled in terms of the Government’s lockdown regulations.

The latest indoor function to be cancelled is our traditional Year-end Dinner which was planned for 11 November.

Although we are currently functioning at lockdown level 1, the Social Action resolved that the protocols with regard to e.g. maintaining the required social distance, would almost certainly be compromised by an indoor function such as this one.

Een van ons langswonende inwoners

Delene Bekker

 Delene Bekker (E58) se veelbewoë lewe het 77 jaar gelede in Kimberley begin waar sy gebore en getoë is. Sy is van Joods/Skotse afkoms.

Hierdie foto is geneem toe Delene twee jaar oud was

In 1958 het sy haar skoolloopbaan aan die Benoni High School voltooi en vervolgens ʼn pos as ʼn klerk by die toentertydse Suid-Afrikaanse Spoorweë en Hawens aanvaar.

Kort voor lank het sy en Joepie Bekker op mekaar verlief geraak. Hy was by Eskom werksaam. In Augustus 1959 is hulle in Germiston getroud.

Alhoewel sy ʼn ruk lank daarna buitenshuis gewerk het, het sy die edele roeping van tuisteskepper aanvaar nadat die eerste van hulle vier kinders sy opwagting gemaak het. Delene het ook ses kleinkinders en een agterkleinkind. Joepie het haar in 2013 ontval.

Joepie het in 1980 die Eskom-kantoor op Bela-Bela op die been gebring. Nadat hy aan die einde van 1993 afgetree het, het hulle in April 1994 na ons oord verhuis. Afgesien daarvan dat hy in die Bestuurskomitee gedien het, het die egpaar saam as toergidse vir verskeie toeroperateurs opgetree. Nadat Joepie oorlede is, het Delene voortgegaan om tot onlangs nog hierdie taak te verrig.

Delene is dus al 26 jaar lank ʼn inwoner van ons oord. Sover skrywer kon vasstel, woon sy langer hier as die meeste ander inwoners.

Oor 'n onlangse Sosiale Aksie-uitstappie

Die sameroeper van die Sosiale Aksie, EDNA CORNELIUS, skryf: Op 8 September was almal sommer vroeg al by die diensbussie. Gerhard en Dimmie kom wens ons ʼn veilige rit toe en Dimmie gee aan ons geld om vir elke passassier ʼn draairoomys by MacDonalds te koop.

Daar word behoorlik geklets op pad na Pretoria. Ons kom sommer vroeg al by die Wonderboom Junction-winkelsentrum aan en elkeen slaan sy eie koers in om hul inkopies te doen.

Op pad na die Green Olive-kwekery, waar ons middagete geniet het, doen ons eers by MacDonalds aan om Dimmie se geld uit te gee. Ons besluit om ʼn foto vir die ooms tuis te laat neem van die groep wat aan hul roomyse smul (foto onder).

Nadat ons ʼn gesellige middagete by die kwekery geniet het, tree die groep weer eens aan vir ’n foto by ou plaasgereedskap (foto onder).

Na ʼn heerlike uitstappie keer ons ietwat stiller terug huis toe. Wat ʼn wonderlike dag!

Botaniese tuin kom dalk langs ons oord

ANDRIES VAN DER HEYDE skryf in Die Pos-koerant van 11 September: ʼn Groep inwoners van Bela-Bela beywer hulle daarvoor om ʼn botaniese tuin op die Alma-pad buite die dorp te vestig in ʼn poging om die natuur vir die nageslag te bewaar.

Een van die gebiede wat hiervoor geïdentifiseer is grens aan die Warmbad Renaissance-aftreeoord.

Die onderstaande foto’s bied ʼn uitsig op die terrein. 

Die bostaande foto is vanaf die ingang van die Tuintuiste-aftreeoord in die rigting van ons oord geneem

Hierdie foto bied ʼn uitsig vanaf die dorpsreservoirs in die rigting van die dorp. Ons oord lê links.

Tinus Ras, DA-raadslid, het onlangs ‘n video versprei waarin gevra word dat inwoners die projek sal ondersteun om die oorblywende deel van Gedeelte 25 (die gedeelte wat van die dorpsreservoirs tot teenaan die Alma-pad en Warmbad Renaissance strek, in ʼn botaniese tuin te omskep.

Inwoners het besluit om dié stuk grond op eie koste te omhein. Die munisipaliteit het reeds mondelings toestemming daarvoor gegee, maar die projek sal afskop sodra skriftelike goedkeuring verkry is, het Ras gesê.

Johan Mills, voorsitter van die Bela-Bela-belastingbetalersforum is ten nouste betrokke by die projek.

“Hierdie projek kan die bewaring van die flora van Limpopo op ʼn wetenskaplike wyse vestig en bydra tot ons dorp as toerismebestemming en as poort  tot die ervaring van die Waterberg-biosfeer en Limpopo. Ons moet egter kan bewys dat die projek beduidende steun in die gemeenskap geniet,” het Mills verduidelik.

Mills het voorts gesê die idee is reeds deur die provinsiale department van natuurbewaring verwelkom en word in beginsel deur die die Suid-Afrikaanse Botansiese Instituut ondersteun.

ʼn Versoekskrif word intussen rondgestuur waarop mense hulle steun aan die beoogde projek kan betuig. Mills het gesê hoe meer mense dit ondersteun, hoe groter is die druk op amptenary om die ontwikkeling gunstig te oorweeg.

‘n Verteenwoordiger van ons oord het op 15 September ‘n vergadering bygewoon waartydens ‘n loodskomitee gestig is. Philip van den Berg (E34) sal ons in die loodskomitee verteenwoordig.

 

Oord verwelkom Henk Botha

Henk Botha (65) is in Nigel gebore, maar hy en sy ouers het in sy kinderjare na Randfontein verhuis. Van toe af, en tot sy aftrede, het hy in hart en niere ʼn Randfonteiner geword. 

Henk het in 1973 aan die Hoërskool Jan Viljoen gematrikuleer. Ná skool het hy ingeskryf ʼn as 'n vakleerling-elektrisiën. Nadat hy sy vakleerlingskap voltooi het, is hy na die Anglo American Platinum Engineering Skills Training Centre oorgeplaas waar hy in die elektriese afdeling klas gegee het. Henk is mettertyd bevorder en het in 2015 as die assistentbestuurder van die sentrum afgetree. 

 Op die vraag waarom hy juis vanaf Randfontein na die Warmbad Renaissance-aftreeoord verhuis het, het hy gesê dat hy dikwels in die omgewing vakansie gehou het en lief geraak het vir die Bosveld. Hy het ons oord besoek, gehou van die Bosveldatmosfeer hier en terstond E19 aangeskaf. Hy beoog om die eenheid op te knap en volgens sy smaak in te rig

Oord verwelkom Apie en Wilma Pretorius

Apie (68) en Wilma (67) Pretorius het onlangs hul intrek in E138 geneem. Hulle is baie ingenome met hulle klein, maar gerieflike woning, asook die vriendelike en hulpvaardige inwoners wat hulle tot dusver ontmoet het. Hulle het ʼn omvattende studie gedoen van aftreeoorde elders voordat hulle op Warmbad Renaissance besluit het. Nou, sê hulle, voel dit asof hulle na ʼn lang vakansie tuisgekom het.

Wilma is in Kimberley gebore en het op Hopetown grootgeword. Sy het in 1971 aan die Hoërskool Hopetown gematrikuleer en in 1972 ʼn ingeskrewe student aan die Universiteit van die Vrystaat geword. Hier het sy in 1975 ʼn BA-graad met Sielkunde en Afrikaans en Nederlands as hoofvakke, en ʼn Hoër Onderwysdiploma behaal.

Sy en Apie het na Potchefstroom verhuis nadat hulle in November 1975 getroud is. Sy het tot haar aftrede in 2018 onder andere jare lank die administrasie van die MBA-kantoor in die Sakeskool van die Universiteit van Potchefstroom behartig.

Apie is op Bothaville gebore en getoë. Nadat hy in 1970 aan die Hoër Volkskool Potchefstroom gematrikuleer het, het hy sy diensplig in die SAW verrig. Vervolgens het hy óók ʼn student aan die Universiteit van die Vrystaat geword waar hy en Wilma vir mekaar ogies gemaak het. Apie het uiteindelik die M.Sc.Agric-graad behaal.

Hy het jare lank landbounavorsing by die Landbounavorsingsraad se Graaninstituut op Potchefstroom gedoen voordat hy sy eie sakeonderneming tot stand gebring het.

Oord verwelkom Estelle Creighton

 Estelle Creighton (81) is op Louisvale gebore en het in Otavi, Namibië, grootgeword. Sy het haar skoolopleiding in 1956 aan die Hoër Meisieskool La Rochelle in die Paarl voltooi, waarna sy ʼn betrekking as ʼn bankamptenaar by die voormalige Trustbank aanvaar het.

Estelle en haar gesin het 55 jaar lank in Bela-Bela gewoon voordat sy na Pretoria verhuis het. Sy het egter besluit om na ons dorp terug te keer en het onlangs haar intrek in E82 geneem.

Vanweë haar vroeëre verbintenis met Bela-Bela, was sy deeglik bewus van ons oord en sy goeie hoedanighede. Sy praat met lof van die vriendelike en hulpvaardige inwoners met wie sy tot dusver te doen gekry het.

Estelle het twee kinders en twee kleinkinders.