Nadat
Johann (76) en Linda Benade (77) hulle kleinhoewe op Kameeldrif-Oos onverwags verkoop
het, moes hulle inderhaas na ‘n geskikte woonplek soek. Hulle het verskeie
aftree-oorde en meenthuiskomplekse in Pretoria, Modimolle en Bela-Bela oorweeg,
maar uiteindelik in Warmbad Renaissance ‘n woonplek raakgeloop wat in die
meeste opsigte aan hulle verwagtinge voldoen het. Die oord se
veiligheidsmaatreëls, goedversorgde terrein en uitstekende waarde vir geld het
die deurslag gegee.
 |
| Linda en Johann Benade |
Johann
is in Roodepoort gebore, het op Meadowlands grootgeword en matriek aan die
Hoërskool Rustenburg geslaag. Hierna het hy ‘n BSc-graad in wiskunde en toegepaste
wiskunde van die Universiteit van Pretoria ontvang. Vervolgens het hy by die
Suid-Afrikaanse Buro vir Standaarde (SABS) in diens getree waar hy tot sy
aftrede as ‘n bestuurder werksaam was. Sy pligte het vereis dat hy male sonder
tal buitelandse reise moes onderneem.
Linda
is in Benoni gebore en het aan die Hoërskool Noord-Oos Rand matriek geslaag. Hierna
het sy tot haar aftrede by Yskor in Pretoria gewerk – hoofsaaklik in ‘n
administratiewe hoedanigheid.
Johann
hou daarvan om sy ledige ure te verwyl met projekte wat bogemiddelde
handvaardigheid vereis. Hy het byvoorbeeld
vir hom en Linda ‘n vakansievoertuig op ‘n Landrover-onderstel gebou wat
elke denkbare gerief bevat. Hulle beplan juis eersdaags ‘n uitgebreide besoek daarmee
aan Namibië. Hierbenewens is hy ‘n ywerige fotograaf en handig met sy rekenaar.
Linda
is gaande oor reis. Sy het Johann op die meeste van sy oorsese sakereise
vergesel. Lees geniet ook voorrang wanneer sy ontspan.
Dié
gemoedelike egpaar is in 1967 getroud. Hulle het een seun en twee kleinseuns.
No comments:
Post a Comment