Die bestuurskomitee het op 25
Februarie die aanbevelings van die "feeskomitee" met betrekking tot
die kwarteeufeesviering van die oord op 22 April 2016, goedgekeur.
Inwoners en oud-inwoners, asook
Reanett Bezuidenhout (bestuursagent) en Werner Pauw (ontwikkelaar) en hulle
gades, kan die funksie bywoon. Skriftelike uitnodigings sal eersdaags
uitgestuur word.
Straatverteenwoordigers van die
sosiale aksiegroep is versoek om ‘n man (of twee) in hulle laan te vra om ‘n
potjie van hulle keuse te maak. Die sosiale aksie sal vir die bykosse sorg. Die
koste daarvan sal van die oord verhaal kan word.
Die makietie sal in die Nes-gemeenskapsaal
en op die grasperk voor die administratiewe gebou plaasvind.
Wanneer die feesgangers by die Nes
opdaag sal een gedenkblad per wooneenheid oorhandig word. Die foto hieronder
toon die voorblad daarvan. Dit bestaan uit 16 bladsye wat, onder andere, ‘n
opsomming van die geskiedenis van die oord en heelwat foto’s bevat. ‘n Inwoner
wat die funksie nie kan bywoon nie, se gedenkblad sal in sy of haar posbus
geplaas word.
Vervolgens sal die verrigtinge met
‘n skriflesing en gebed geopen word, waarna die voorsitter van die
bestuurskomitee die aanwesiges sal verwelkom.
Nadat ‘n inwoner ‘n heildronk op
die oord ingestel het, volg "Uit toeka se dae". Vyf persone sal
vertel van hulle wedervarings toe die oord pas begin is. Die name van hierdie
persone sal mettertyd bekend gemaak word sodra finale reëlings met hulle getref
is.
Ten slotte sal ‘n bedankingswoord
of twee gespreek word en daarna neem die ete en drinke ‘n aanvang. Alhoewel die
kos gratis voorsien sal word, word inwoners aangeraai om hulle eie eetgerei en drinkgoed
saam te bring.
‘n Glas (of meer) tafelwyn sal
beskikbaar wees aan diegene wat 'n donasie in 'n houer plaas.
Soos reeds vermeld, is die oord
verantwoordelik vir die koste van die maaltyd. ‘n Groot deel van die onkoste
aan die gedenkblad word gedra deur plaaslike sakeondernemings en ander persone
wat bladsye geborg het. Hulle besonderhede verskyn in die blad.
Die oord erken ook met dank ‘n skenking
deur Rita Senekal wat ’n hele R1 000 tot die verrigtinge bygedra het.
No comments:
Post a Comment