Die Haarhoffs van Bloemfontein

Helena en Nico Haarhoff

Nico (76) en Helena (68) Haarhoff het onlangs hulle intrek in E56 geneem. Hulle het voorheen in Bloemfontein gewoon en het hierheen verhuis omdat dit nader aan 5 van hulle 7 kinders, 19 kleinkinders en 8 agterkleinkinders is.

Nico is in Cradock gebore en het die Uitenhage Tegniese Hoërskool (tans die Hoër Tegniese Skool Daniël Pienaar) bygewoon waar hy in 1959 matriek behaal het. Hierna het hy in 1962 ‘n vakleerlingskap in motorwerktuigkunde suksesvol voltooi.

Nico sê dat sy beroepslewe twee hoogtepunte ingesluit het. Hy was aanvanklik ‘n geruime tyd lank ‘n onderwyser aan die Bloemfonteinse Tegniese Hoërskool (tans die Hoër Tegniese Skool Louis Botha). Daarna het hy by die Suid-Afrikaanse weermag in Bloemfontein aangesluit. Hy het met die rang van AO1 afgetree nadat hy lank in beheer was van die beplanningskantoor van die Kommandement Oranje-Vrystaat se tegniese werkplaas.

Helena is in Graaff-Reinet gebore. Sy het in 1967 matriek aan die Hoërskool Hartswater behaal. Nadat sy haar skoolopleiding voltooi het, het sy ‘n haarkapster geword.

Nico en Helena het in die Welgedacht-aftreeoord in Bloemfontein ontmoet en is in 2007 getroud. Albei was voorheen getroud.