Uittreksel uit die 4de kwartaal se nuusbrief
Van iemand af wat weet waaroor ons inwoners bekommerd is en nie verstaan! Dankie Johann
kVA - Wat is dit ?
Op ons
maandelikse state wat ons vanaf Renaissance ontvang, is daar twee inskrywings
wat betrekking het op elektrisiteit, kWh en kVA.
kWh verwys na die totale hoeveelheid
elektrisiteit wat jy gedurende ‘n bepaalde
maand verbruik.
kVA verwys na die maksimum tempo
waarteen jy elektrisiteit gedurende ‘n
bepaalde tydperk verbruik het. Hierdie tydperk kan van korte duur wees soos ‘n
uur of so. kVA kan gesien word as ‘n soort boete wat gehef word vir ’n te hoë
tempo van verbruik. Dis soos om met jou motor deur ‘n snelstrik te jaag. Hoe
vinniger jy op daardie stadium gery het, hoe hoër is die boete - ongeag of jy
net na Pretoria of dalk na Kaapstad toe oppad was.
Hier
is twee scenarios.
Scenario
A
Jy bak op
Maandag ‘n koek in die oond, Dinsdag kook jy ‘n pot sop op die stoof, Woensdag
besluit jy om te stort en skakel die geiser aan, Donderdag stofsuig jy al die
matte in jou huis, Vrydag was jy wasgoed in jou wasmasjien en tuimeldroog dit
daarna en Saterdag stryk jy al die wasgoed. Jy het dus elke dag een of ander
elektriese toestel in jou huis vir ‘n tydlank gebruik. Daardie verbruik word as
kWh op die meter langs jou huis geregistreer.
Scenario
B
Die
volgende week hoor jy dat iemand kom vir ‘n paar dae kuier en jy moet
noodgedwonge ál die takies wat jy die
vorige week oor ses dae uitgevoer het, nou
sommer in één dag afhandel. Aan die einde van daardie dag het jy net soveel
krag as in scenario A verbruik, so die kWh is dieselfde. Maar hierdie keer het
jy al daardie krag in net één dag gebruik, m.a.w. die tempo van
krag-verbruik was in scenario B baie
hoër as in scenario A. Dit word gemeet in kVA.
So, wat
maak dit saak of ek al die krag in een dag of oor ses dae gebruik? Dis mos
dieselfde hoeveelheid krag! ☹
Gestel jy
gebruik jou eie generator om
elektrisiteit op te wek. In scenario A gebruik jy min krag op ‘n bepaalde
tydstip en ‘n klein generator sal voldoende wees. Jy kan dit selfs afskakel van
tyd tot tyd. In scenario B gebruik jy baie meer krag op ‘n bepaalde tydstip
want jy het die geiser, die oond, die stoof en die wasmasjien dalk alles
gelyktydig aan. Jy sal dus ‘n baie
groter generator benodig en dit sal heeldag aangeskakel moet wees. Wanneer die kuiergaste weer weg is, sal
‘n klein generator weer voldoende wees, maar jy moes noodgedwonge
‘n groter een koop vir tye soos wanneer jy gaste kry. Meeste van die tyd
werk die groot generator egter nou
halfstoom want dit is eintlik té groot . Jy moes egter die kapitale
uitleg maak vir die groter generator wat jy net soms gebruik. Dis onproduktief
en onekonomies.
Eskom is
in dieselfde bootjie. Hulle moet groot kragstasies en groot netwerke en baie
mense hê om elektrisiteit te enige tyd en oral
te verskaf wanneer huishoudings
én fabrieke dit benodig, dag of nag. Snags
en oor naweke en vakansies sluit baie
fabrieke en die kragverbruik verminder drasties, maar al die kragstasies
en netwerke en mense is steeds daar en dit kos deurlopend geld. Omdat die
verbruik dan laer is, is Eskom se inkomste uit die verkoop van elektrisiteit
ook laer, dit is weereens onproduktief
en onekonomies - maar dis nodig. Sien
kVA dus as ‘n soort versekering met ‘n gereelde premie wat ons betaal vir die gerief om altyd
voldoende elektrisiteit te hê. (Knyp maar vir eers jou oë toe vir beurtkrag)
Renaissance
koop grootmaat elektrisiteit aan van die munisipaliteit. Dit word gelewer teen
11 000 Volt, 3-fase. Ons skakel dit om na 230 Volt, 1-fase, en versprei
dit dan na elke wooneenheid. Die rekening vir grootmaat elektrisiteit, soos aan
Renaissance en fabrieke gelewer, bestaan
ook uit kWh- en kVA- komponente. Grootmaat
elektrisiteit, ten spyte van die kVA-heffing, is steeds goedkoper as die elektrisiteit wat aan die
dorpsmense verskaf word teen net kWh-tarief. Grootmaataankope is altyd
goedkoper per eenheid, soos bv. grootmaat melk,
grootmaat toiletpapier en grootmaat mieliemeel.
Die
kVA-rekening vanaf die munisipaliteit word pro-rata volgens elkeen se
kWh-verbruik onder inwoners verdeel. Dit varieer dus maandeliks. Al is
Renaissance se kWh-rekening die volgende maand dieselfde as die vorige maand,
sal die kVA-rekening nogtans verskil, omdat
die tempo van verbruik van dag tot dag en uur tot uur en selfs minuut tot
minuut, varieer. Jy ry nie altyd dieselfde spoed wanneer jy deur die snelstrik
ry nie en gevolglik varieer die boete ook. Hierdie boete word pro-rata onder
inwoners verdeel en wys as jou kVA-aanslag.
Volgende
keer kyk ons na hoe die snelstrik werk en of ons dit dalk kan omseil - of
minstens die boete kan verlaag. 😊
No comments:
Post a Comment