Special General Meeting - 2016

The main purpose of this mid-year meeting was to review the financial statements for 2015 which was prepared by the Warmbad Renaissance Association’s external auditors, PricewaterhouseCoopers Inc.

Kontrei-ete 2016

Kerrie-afval + bobotie + wildpastei + toffiepatats + stampmielies + boeremusiek = die heerlike kontrei-ete wat die sosiale aksie onlangs aan inwoners opgedis het.

Die foto’s hieronder bied ‘n oorsig van die verrigtinge.

Inwoner maak 'n verskil in die gemeenskap

Jy tref in elke gemeenskap talle beskeie mense aan wat stilweg met groot toewyding en deernis werk om minderbevoorregte persone se nood te verlig.

Ongereelde besoekertjies

Ons oord is geseën met ‘n ryke verskeidenheid voëllewe wat wydverspreid in ons geweste voorkom: kuifkophoutkappers, kwêvoëls, neushoringvoëls, tiptolle, suikerbekkies, katlagters, kakelaars, geelbeklysters, rooikophoutkappers, om maar enkeles te noem.

Die kwêvoel

Onlangs het twee gevlekte lysters kom besoek aflê. Alhoewel hierdie voëltjies  volgens kenners vry algemeen in die Bosveld voorkom, het Rina Breytenbach (E118) en haar bure hulle die eerste keer in 20 jaar in die oord waargeneem.

Die gevlekte lyster

Soos die foto aantoon, is hierdie pragtige voëltjie grysbruin bo met kenmerkende swart vlekke op die wit borsie en ‘n kort stertjie. Wanneer hy op die grond stilstaan, het hy ‘n kiertsregop houding en die gewoonte om vooroorgeboë te hardloop, net om weer stil te staan, agteroor te leun en een van sy vlerke te lig.

Volgens Sappi se Voëls van Suid-Afrika, word hulle aangelok deur veldbrande en bou hulle nessies van plantmateriaal in ‘n boom, soms in die nabyheid van ‘n miksterbyvangernes.

Die mikstertbyvanger

Plaaslike koerant skenk boeke aan oord se biblioteek

Die plaaslike koerant, Die Pos, het op 29 Augustus ‘n stapel splinternuwe boeke aan die oord se biblioteek geskenk. Die skenking is moontlik gemaak in medewerking met die Pretoria Boekhuis. Hier oorhandig Alet Erasmus, Die Pos se proefleser en ‘n inwoner van ons oord, die boeke namens die koerant aan Hester Botes. Hester is in beheer van die oord se biblioteek.

Staatmakers onderneem inkopietog

Die Sosiale Aksie is ‘n subkomitee van die Warmbad Renaissance-bestuurskomitee wat hulle ten doel stel om sosiale funksies vir die inwoners te reël.

Vanjaar was die Sosiale Aksie verantwoordelik vir die reëlings van die potjieskos-ete ter viering van die oord se 25ste bestaansjaar – ‘n taak wat hulle met entoesiasme en groot sukses aangepak het. Tradisioneel reël hulle onder andere jaarliks ook ‘n Valentynsdagtee, ‘n lente-ontbyt en ‘n jaareinddinee. Hierdie funksies vul hulle aan met geleenthede soos gereelde kerrie-en-rys- en vetkoekverkopings.

Die Sosiale Aksie verrig ‘n reusetaak en maak staat op ‘n handjievol staatmakers vir wie se hande min verkeerd staan.

Hierdie staatmakers het hulself onlangs op ‘n inkopietog na die Kolonnade-winkelsentrum in Pretoria getrakteer.

Hiervoor is die oord se diensbussie gebruik. Dimmie Smith het die bestuurwerk gedoen en sy passasiers het die brandstof- en tolhekkoste onder mekaar verdeel.

Die diensbussie en aangewese bestuurders Gerhard van Rooyen, Hennie de Villiers en Dimmie Smith

Die onderstaande foto’s is geneem nadat die groepie moeg, maar tevrede en opgeruimd teruggekeer het.

Leon en Marlene Barnard, en Rina Steynberg

Die diensbussie se laairuimte propvol inkopies

Stokflou maar tevrede. Hier verskyn (v.l.n.r.) Linkie Ellis, Rita Vosloo, Marie Snyman, Mel Smith, Dimmie Smith, Nadene Horn, Marlene Barnard, Rina Steynberg en Leon Barnard.

 

Wooneenhede gesog

Die ingangshek van een van die mooiste en mees bekostigbare aftree-oorde in die Bosveld